२५ असार, काठमाडौं । ब्लुप्रिन्ट ट्रेडिङ प्रालिले केही सञ्चारमाध्यममा आफ्नो प्रालीले ‘सेनेटरी प्याड’ आयात गरेको भनेर आएका समाचार तथ्यहीन, भ्रामक र गलत भएको स्पष्ट पारेको छ ।

प्रधानमन्त्री शेरबहादुर देउवाका छाेरा जयवीर सिंह देउवा मुख्य शेयरहाेल्डर रेहेकाे उक्त कम्पनीले सेनेटरी प्याड आयात गर्ने गरेकाे र साेही कम्पनीलाइ पाेस्न बजेटमार्फत उक्त प्याडकाे आयातमा लाग्ने भन्सारमा ९० प्रतिशत छुट गरेकाे भनी सञ्चारमाध्यमहरूमा समाचार अाएका थिए ।

विभिन्न सञ्चारमाध्यमले ब्लुप्रिन्ट ट्रेडिङले सेनेटरी प्याड आयात गरेको भनेर समाचार प्रकाशित गरेपछि आज कम्पनीले प्रेस विज्ञप्ति जारी गर्दै आफूहरुले बालबालिकाका लागि डाइपर मात्रै आयात गर्ने गरेको बताएकाे छ ।

“सञ्चारमाध्याममा ब्लुप्रिन्ट ट्रेडिङ प्रालीका विषयमा बिनाआधार र प्रमाण प्रकाशित भएका समाचारप्रति हाम्रो गम्भीर ध्यानाकर्षण भएको छ ।

ब्लुप्रिन्ट ट्रेडिङ नेपालमा बालबालिकाका लागि प्रयोग हुने डाइपर आयत गर्ने कम्पनी हो”, कम्पनीका प्रबन्ध निर्देशक हेमन्त बजगाईंले जारी गरेको विज्ञप्तिमा भनिएको छ । कम्पनीले स्थापनादेखि अहिलेसम्म सेनेटरी प्याड आयात नगरेको जनाएको छ ।

“बिनाआधार हाम्रो कम्पनीको मान हानि हुनेगरी प्रकाशित-प्रसारित समाचार गलत भएको यसै विज्ञप्तिमार्फत आम नागरिकलाई जानकारी गराउँदछौँ”, विज्ञप्तिमा भनिएको छ ।