९ मंसिर, एजेन्सी । प्रधानमन्त्री नरेन्द्र मोदीले बिहीबार उत्तर प्रदेशको पाँचौं अन्तर्राष्ट्रिय विमानस्थल जेवर विमानस्थलको शिलान्यास गर्ने भएका छन् । यो भारतको सबैभन्दा ठूलो र विश्वको चौथो ठूलो विमानस्थल हुनेछ। यो विमानस्थल पूर्णरुपमा प्रदूषणमुक्त हुनेछ ।

जेवर एयरपोर्ट दिल्ली-एनसीआरमा दोस्रो अन्तर्राष्ट्रिय विमानस्थल हुनेछ। यो विमानस्थल यस हिसाबले पनि विशेष छ, किनभने यो उत्तर प्रदेशको पाँचौं अन्तर्राष्ट्रिय विमानस्थल हुनेछ।

तमिलनाडु र केरला देशका मात्र राज्यहरू हुन् जसमा ४/४ अन्तर्राष्ट्रिय विमानस्थलहरू छन्। यो पूरा भएपछि, उत्तर प्रदेश सबैभन्दा धेरै अन्तर्राष्ट्रिय विमानस्थल भएको राज्य बन्नेछ।

२०१२ सम्म प्रदेशमा २ वटा मात्रै अन्तर्राष्ट्रिय विमानस्थल थिए । अक्टोबर २० मा प्रधानमन्त्री नरेन्द्र मोदीले उद्घाटन गरेपछि कुशीनगर अन्तर्राष्ट्रिय विमानस्थल सुरु भएको थियो भने अयोध्यामा अन्तर्राष्ट्रिय विमानस्थल बन्न लागेको छ, जहाँ आगामी वर्षदेखि सेवा सुरु हुनेछ।

फेब्रुअरी २०२१ मा, उत्तर प्रदेश सरकारले जेवर एयरपोर्टको निर्माणको लागि २,००० करोडको बजेट घोषणा गरेको थियो। यसलाई पूरा गर्न करिब २९ हजार ६५० करोड रुपैयाँ लाग्न सक्छ । ५ हजार ८ सय ४५ हेक्टर जमिनमा जेवर विमानस्थल निर्माण हुन लागेको हो ।

यहाँबाट एकैपटक कम्तीमा १७८ विमान उड्न सक्नेछन् । पहिलो चरणमा १ हजार ३ सय ३४ हेक्टर जग्गामा निर्माण हुनेछ । निर्माण कार्य ४ चरणमा सम्पन्न हुनेछ ।

यो विमानस्थल बनेपछि इन्दिरा गान्धी अन्तर्राष्ट्रिय विमानस्थलको चाप निकै कम हुने विश्वास पनि लिइएको छ । विमानस्थलको पहिलो चरणको काम सन् २०२४ सम्ममा सम्पन्न हुने अपेक्षा गरिएको छ ।

पहिलो चरणको काम सम्पन्न भएपछि विमानस्थलको वार्षिक क्षमता १२ करोड यात्रु हुनेछ ।