४ कात्तिक, काठमाडौं । पाल्पा जिल्लाको माथागढी गाउँपालिका भित्रका ठाउँमा भुस्याहा कुकुरले टोक्दा एकैदिन २८ जना घाइते भएका छन् ।

घाईतेहरुको तानसेन स्थित युनाइटेड मिसन अस्पतालमा उपचार भइरहेको अस्पताल प्रशासनले जनाएको छ ।यस क्षेत्रका चिदीपानी, रुप्से र कसेनी लगायतका स्थानमा कुकुरले मानिस र पशु चौपायलाई टोक्ने गरेको स्थानीयको जानकारी दिएका छन् । सो क्षेत्रमा केहि दिनयता भुस्याहा कुकुरको विगविगी बढेको हो ।

बिहिबार भुस्याहा कुकुरको टोकाइबाट २८ जना घाइते भएका छन् । माथागढीको वडा नं. १, चिदीपानी, २ रुप्से र ३ कसेनीका मानिसलाई भुस्याहा कुकुरले टोकेर घाइते बनाएको माथागढी–१ चिदीपानीका वडा अध्यक्ष राजकुमार पन्थीले जानकारी दिनुभयो ।

भुस्याहा कुकुरले कोहीलाई अनुहार, खुट्टा तथा हातका विभिन्न भागमा टोकेको छ । माथागढी १ को चिदीपानी बाहाखोक, कुनाबारी, ढकालकुना, दोहोरा, सोले खहरे, सराइ आसपासमा कुकुरले टोकेको हो ।