१३ भदौ, काठमाडौं । भारतको नोएडास्थित ट्विन टावरलाई विस्फोटक पदार्थले ध्वस्त पारेपछि त्यहाँ वातावरण र प्रदूषणको चिन्ता बढेको छ।

भारतीय सञ्चारमाध्यमका अनुसार झन्डै ५ किलोमिटर परसम्म बसोबास गर्ने मानिससँगै बिरामी, रुख र बोटबिरुवाले पनि यसबाट हुने क्षति बेहोर्नु पर्नेछ।

त्यसैगरी दुई किलोमिटरभित्र रहेका जलचर, जनावर, पंक्षीलगायत वनस्पतिमा पनि यसको बढी असर पर्नेछ। यसबाट बच्न करिब एक सातासम्म लगातार पानी छर्किनुपर्ने हुन्छ। वर्षा भयो भने अवस्था फेरिन्छ।

टावर आसपास बसोबास गर्ने व्यक्तिलाई पनि स्वास्थ्य सम्बन्धी समस्या हुनेछ, पहिलेदेखि नै बिरामी भएकाको समस्या निकै बढ्न सक्छ। फोहोरले पनि प्रदूषण बढाएको छ। यसको समाधान चुनौतीपूर्ण हुनेछ। 

वरपरका पाँच हजारभन्दा बढी रुखमा प्रदूषण र विस्फोटको ठूलो प्रभाव आगामी दिनमा देखिनेछ। तीन महिनामा भग्नावशेष हटाउन पनि चुनौतीपूर्ण हुनेछ।