नेपाली कांग्रेसको निवर्तमान सभापति शेरबहादुर देउवा समूहले अब पार्टीभित्र एकता गर्ने सम्भावना ९९ प्रतिशत सकिएको निष्कर्ष निकालेको छ। समूहको सम्पर्क कार्यालय चुनदेवीमा शुक्रबार बसेको बैठकले मिल्ने सम्भावना ९९ प्रतिशत सकिएको निष्कर्ष निकालेको नेता मिन विश्वकर्माले जानकारी दिए। 

बैठकमा निवर्तमान कार्यवाहक सभापति पूर्णबहादुर खड्का पूर्व महामन्त्री डाक्टर शशांक कोइराला लगायतले संस्थापनका नेताहरूसँग पार्टीमा एकता कायम राख्नका लागि भएका भेटवार्ताबारे जानकारी गराएका थिए।

ती भेटवार्तामा संस्थापन पक्षका नेताहरू एकताका लागि लचिलो नदेखिएकाले अब एकता नहुने सम्भावना ९९ प्रतिशत निकालिएको यता विश्वकर्माले जानकारी दिए। 

पार्टीमा एकता कायम नहुने भएपछि कसरी अगाडि बढ्ने भन्ने विकल्प निकाल्न समूहले साउन मसान्तभित्र राष्ट्रिय भेला बोलाउने निर्णय समेत गरेको छ। भेला कहिले बोलाउने भन्ने घोषणा साउन ६ गते बीपी स्मृति दिवसका दिन समूहले राष्ट्रिय प्रज्ञा प्रतिष्ठानमा बोलाएको कार्यक्रममा गरिने विश्वकर्माले जानकारी दिए।

 बैठकमा कार्यक्रमलाई कसरी सफलतापूर्वक सम्पन्न गर्ने भन्ने विषयमा पनि कुराकानी भएको थियो।