१८ पुस, केप टाउन  । दक्षिण अफ्रिकाको संसद भवनमा भीषण आगलागी भएको छ। राजधानी केप टाउनमा अवस्थित संसद भवनमा आइतबार भीषण आगलागी भएको हो। 

आगलागी नियन्त्रणको लागि ठूलो संख्यामा अग्नि नियन्त्रकहरु खटिएका छन्। आइतबार बिहानै सल्केको आगो नियन्त्रणबाहिर रहेको बताइएको छ। 

‘संसद भवनमा आगलागी भइरहेको छ। सो परिसरभित्र रहेको राष्ट्रिय सभा भवनमा पनि आगो लागिरहेको छ।

अग्नि नियन्त्रकहरु आगलागी नियन्त्रणमा खटिएका छन्’, केप टाउनस्थित आपतकालीन विभागका प्रवक्ताले समाचार एजेन्सी एएफपीसँग भनेका छन्। 

आगलागीको कारणबारे हालसम्म पत्ता नलागेको बताइएको छ। घटनाबारे विस्तृत विवरण आउन बाँकी रहेको अन्तरराष्ट्रिय मिडियामा खबर छ।