१४ माघ, बाजुरा । त्रिवेणी नगरपालिका-७ का वडाध्यक्ष प्रेमबहादुर थापालाई प्रहरीले पक्राउ गरेको छ।

थापाले माघ १० गते नगर कार्यपालिकाको निर्णय पुस्तिका च्यातेको र कर्मचारी प्रशासन तथा जनप्रतिनिधिमाथि अभद्र व्यवहार गरेका भन्दै नगरपालिका निमित्त प्रमुख प्रशासकीय अधिकृत्त चिरञ्जीबी शाहले माघ १२ गते दिएको उजुरीको आधारमा वडाअध्यक्ष थापालाई पक्राउ गरिएको जिल्ला प्रहरी कार्यालयका प्रहरी निरीक्षक देबेन्द्रराज जोशीले बताए। 

जोशीका अनुसार प्रहरीमा वडा नम्वर ७का अध्यक्ष प्रेमबहादुर थापा र ९ का अध्यक्ष वीरबहादुर विष्टको नाममा उजुरी परेका छ।

विष्टको खोजीकार्य जारी रहेको प्रहरीले जानकारी दिएको छ। दुई जनाको नाममा उजुरी छ, एक जनामात्र पक्राउ गरिएको र एक जनाको खोजीकार्य जारी रहेको प्रहरी निरीक्षक जोशीले बताए।