काठमाडौं । विश्व खेलकुदको महाकुम्भ ओलम्पिक दर्शक विना नै सञ्चालन हुने भएको छ ।

यही जुलाई २३ देखि जापानमा शुरु हुने टोकियो ओलम्पिकमा दर्शकलाई प्रवेश निषेध गरिएको छ ।

कोरोना महामारीलाई ध्यानमा राख्दै ओलम्पिकमा दर्शकलाई प्रवेश निषेध गर्ने निर्णय गरिएको हो ।

बिहीबार जापान सरकार, अन्तर्राष्ट्रिय ओलम्पिक कमिटी, अन्तर्राष्ट्रिय पाराओलम्पिक कमिटी, टोकियो २०२० आयोजक समिति र टोकियो मेट्रोपोलिटानबीच बैठकले दर्शकलाई प्रवेश गर्न नदिने निर्णय गरेको हो ।

‘टोकियोमा दर्शकलाई अनुमति नदिने विषयमा हामी सहमतिमा पुग्यौं,’ जापानका ओलम्पिक मन्त्री तामायो मारुकावाले भने ।

यसअघि नै आयोजकले विदेशी दर्शकलाई प्रवेश निषेध गर्ने निर्णय गरिसकेको छ ।

जापान सरकारले टोकियोमा संकटकाल लागू गरेपछि ओलम्पिकमा दर्शकलाई निषेध गर्ने निर्णयमा आयोजक पुगेको हो ।

टोकियोमा पछिल्लो समय कोभिड–१९ को संक्रमण बढ्दै गएको छ । जसका कारण ओलम्पिकमा दर्शकलाई प्रवेशको अनुमति नदिने भएको हो ।

जापानी प्रधानमन्त्री योशिहिदे सुगाले कोभिड–१९ को डेल्टा भेरियन्ट फेलिरहेकाले टोकियोलाई सुरक्षित राख्न आवश्यक रहेको बताएका छन् ।

टोकियो २०२० का अध्यक्ष सेइको हासिमोटोले दर्शकलाई प्रवेश अनुमति दिन नपाउँदा दुःख लागेको बताए ।

उनले ओलम्पिकका लागि टिकट लिइसकेकाहरुसँग माफी समेत मागेका छन् ।

ओलम्पिक शुरु हुन अब दुई साता मात्र बाँकी छ । ३१औं गृष्मकालीन ओलम्पिक जुलाई २३ देखि अगष्ट ८ सम्म जापानमा आयोजना हुँदैछ ।

जहाँ ३३ खेलका ३३९ इभेन्ट हुनेछन् । प्रतियोगितामा करिब ११ हजार खेलाडीले सहभागिता जनाउनेछन् ।

फुटबल र सफ्टबलका खेलहरु भने जुलाई २१ मै शुरु हुनेछन् ।