११ साउन, दाङ । सल्यानको कुपिण्डे दहमा टिकटक बनाउनेक्रममा डुबेका युवकको २४ घण्टापछि शव निकालिएको छ ।

टिकटक बनाउनेक्रममा मंगलबार दिउँसो साढे १२ बजेतिर डुंगाबाट खसेका कपुरकोट गाउँपालिका–६ सिनवाङका ३६ वर्षका बेदबहादुर बस्नेतको शव बुधबार दिउँसो साढे १२ बजेतिर निकालिएको हो ।

सुर्खेतबाट गोताखोरको टोली बोलाएर उनको शव निकालीएको हो । शवलाई जिल्ला अस्पतालमा पोष्टमार्टमा लागि लगिएको छ ।

शवको पोष्टमार्टमपछि परिवारलाई जिम्मा लगाइने जिल्ला प्रहरी कार्यालय प्रमुख डिएसपी सुमित खड्काले बताए ।

बस्नेत केही समय अघिमात्रै विदेशबाट फर्केर परिवारसँग घुम्न गएका थिए । बस्नेतको परिवार सल्यान घर भएपनि उनी दाङको तुलसीपर-६ मा बस्दै आएको प्रहरीले जनाएको छ ।