क्रान्तिकारी कम्युनिस्ट पार्टीले सङ्गठनात्मक  मोडालिटी सम्बन्धमा महाधिवेशनबाट नै टुङ्गो लगाउने भएको छ । मङ्सिरको दोस्रो हप्ताबाट काठमाडौँमा हुन लागेको एकता महाधिवेशनले महासचिवमा जाने कि अध्यक्षको मोडालिटीमा जाने भन्ने विषय महाधिवेशनले टुङ्गो लगाउने नेता हुकुम सिंहले बताए ।

महाधिवेशनको तयारीबारे सोमबार रातोपाटीसँग कुरा गर्दै उनले भने– ‘पार्टीको सङ्गठनात्मक प्रणाली महासचिव हुने कि अध्यक्ष हुने विषयमा अहिले निष्कर्षमा पुगेका छैनौ । कुन प्रणाली अपनाउने भन्ने विषय अब महाधिवेशनले नै टुङ्गो लगाउँछ । यद्यपि महासचिव प्रणालीमा जाने सम्भावना बढी देखिन्छ ।’ 

महाधिवेशनले महासचिव प्रणालीमा जाने निर्णय गरे स्थायी समिति, पोलिटब्युरो समिति र केन्द्रीय समिति रहने सिंहले जानकारी  दिए । उनका अनुसार अध्यक्ष प्रणालीमा गए अध्यक्ष, उपाध्यक्ष, महासचिव, सचिव लगायत बहुपदीय संरचना हुनेछ । बहुपदीय प्रणालीमा गए पनि स्थायी समिति, पोलिटब्युरो र केन्द्रीय समिति हुने उनले बताए ।  

महाधिवेशन मङ्सिर १० देखि २२ गतेसम्म काठमाडौँमा गर्ने निर्णय गरेको छ । बन्द सत्रमा करिब पाँच सय प्रतिनिधि सहभागी हुने उनले जानकारी दिए । केही जिल्लाबाहेक सबै जिल्ला सम्पन्न भइसकेको छ । महाधिवेशनको तयारी लगभग अन्तिम चरणमा पुगेको सिंहले बताए । 

यही वैशाख १९ गते क्रान्तिकारी कम्युनिस्ट पार्टी र नेकपा मसालबाट चोइटिएको सन्तबहादुर नेपाली समूहबिच पार्टी एकता भएपछि महाधिवेशन हुन लागेको हो । त्यसअघि २०८० साल वैशाख १८ गते विप्लव नेतृत्वको नेकपाबाट अलग भएको धमेन्द्र  बास्तोला नेतृत्वको नेकपा बहुमतसँग एकता भएको थियो । तर संयोजक मोहन वैद्यको विचारप्रति असहमति जनाउँदै साउन १ गते बास्तोला समूह एकता महाधिवेशनमा सहभागी नहुने भन्दै अलग भएको थियो ।