वीरगञ्ज । भारतसंग नेपालको प्रमुख व्यापारिक तथा प्रवेश नाका वीरगञ्ज पुनः कोरोना संक्रमणको हटस्पट बन्दै गएको छ । कोराना संक्रमण रोक्न समयमै सिमामा कडाइ नगरिएको कारण आर्थिक महानगरी वीरगन्जको अवस्था भयावह उन्मुख हुदै गएको छ । संक्रमितको संख्या बढ्दै गएका कारण स्वास्थ्य संस्थाहरूको अवस्था पनि दयनीय बन्दै गएको छ । आवश्यकता अनुसार पर्याप्त भेन्टिलेटर छैन ।

पर्सामा बढ्दो कोरोना संक्रमणको त्रास र मृत्युका घट्नाबीच पनि समस्यासंग जुध्न सहयोग र साथ जुटन थालेको छ । सरकारी निति लथालिग भएपनि सहयोगी हातहरु बढन थालेका छन् । निःशुल्क अक्सिजन, एम्बुलेन्स र शववाहनको ब्यवस्था जुट्दै गएको छ । गैरसरकारी संस्थाहरुसंग सहकार्य गर्दै वीरगन्ज महानगरपालिकाले विभिन्न संक्रमतिहरुलाई सहयोग गर्न विभिन्न कार्यक्रमहरु संचालनमा ल्याएको छ । संक्रमणको कारण अप्ठ्यारोमा परेका नागरिकको जीवन रक्षाका लागि महानगरपालिकाले निःशुल्क अक्सिजन बैंक स्थापना गरेको नगरप्रमुख विजयकुमार सरावगीले बताउनु भयो

महानगरपालिकाले कोरोना संक्रमित भइ होम आइसोलेसनमा रहेका संक्रमितका लागि आवश्यक पर्ने औषधि किटसमेत निःशुल्क रुपमा वितरण गर्न थालेको छ । पारासिटामोल, भिटामिन सि, भिटामिन डि, एसिडिटी रोक्ने औषधि र एन्बिायोटिक जस्ता आठ प्रकारका औषधि महानगरले उपलब्ध गराएको छ । संक्रमितलाई औषधिको प्रयोग विधि र मात्रासमेत बताउने गरिएको छ र कोरोना संक्रमितलाई लक्षणअनुसार चलाइने सहयोगी औषधि प्रदान गरिएको महानगरका नगर प्रमुख सरावगीको भनाइ छ ।

पर्सा क्षेत्र नम्बर १ बाट निर्वाचित प्रतिनिधि सभा सदस्य प्रदिप यादवको संसदीय क्षेत्र विकास कोष र वीरगन्ज महानगरपालिकाको संयुक्त लगानीमा निःशुल्क एम्बुलेन्स र शव वाहन बुधबारदेखि सञ्चालनमा ल्याइएको छ । एम्बुलेन्स हस्तान्तरण गर्दै सांसद यादवले महामारीको समयमा निःशुल्क एम्बुलेन्स सेवाले थोरै भएपनि सहयोग मिल्ने विश्वास व्यक्त गर्नुभयो ।

महानगरले वीरगंजमै अक्सिजन सुविधासहितको डेढ सय बेड क्षमतको आइसोलेसन वार्ड बनाउन योजना अघि बढाएको छ । मेयर सरावगीले महानगरसँग १५ बेडको अस्पताल सञ्चालन गर्न मात्र अधिकार रहेकोले केन्द्र सरकार र स्थानीय प्रशासनको अनुमतिमा डेढ सय बेडको अक्सिजनसहितको आइसोलेसन वार्डको तयारी अन्तिम चरणमा पुगेको छ । संकटको घडीमा महानगपालिकाले बढाएको सहयोगी हातले कारोना बिरुद्धको लडाईमा संक्रमितहरुलाई अवश्यनै ठुलो आशा जगाएको छ ।