१७ भदौ, नुवाकोट । रसुवागढीबाट सामान बोकेर काठमाडौं जाँदै गरेको कन्टेनर कालिकाको कच्ची सडकमा दुर्घटना भएको छ । दुर्घटनामा सोही कन्टेनरमा मालिकसमेत रहेका चालकको ज्यान गएको छ । 

बिहीबार ना३ख १९१ नं. को मालबाहक कन्टेनर दुर्घटना हुँदा दोलखाको गौरिशंकर ५ का २३ वर्षीय चालक विश्वनाथ भुजेलको मृत्यु भएको रसुवाका प्रहरी प्रहरी नायव उपरीक्षक कुलदीप चन्दले जानकारी दिए ।

पहिरोका कारण पासाङल्हामु मार्ग अन्तरगत वनुवाघुम्ती–कालिकास्थान सडकमार्ग अवरुद्ध भएपछि बैकल्पिक मार्ग धारापानी–जिरोकिलो सडकबाट गएको ट्रक चौकीपारवा भन्ने स्थानको कच्ची सडकबाट एकसय मिटर तल भीरमा खसेको थियो।

दुर्घटनामा भुजेल गम्भीर घाइते भएका थिए। उनलाई उपचारका लागि नुवाकोट जिल्ला अस्पताल त्रिशूली ल्याइएको थियो ।

त्रिशूली अस्पतालमा उनको प्रारम्भिक उपचार गरी थप उपचारका लागि त्रिवि शिक्षण अस्पताल महाराजगन्ज पुर्‍याइएको थियो।

सोही अस्पतालमामा उपचारका क्रममा बिहीबार बेलुकी चालक भुजेलको ज्यान गएको डिएसपि चन्दले बताए । 

ट्रक रसुवागढीस्थित भन्सारबाट तयारी पोशाक लिएर काठमाडौं जाँदै थियो ।