१७ पुष, काठमाडौं । नेपाल इन्भेस्टमेन्ट र मेगा बैंकबीचको मर्जर प्रक्रिया पूरा भएको छ । राष्ट्र बैंकले मर्जरका लागि आइतबार अन्तिम स्वीकृति प्रदान गरेपछि ती बैंकहरूको मर्जर प्रक्रिया पूरा भएको हो ।

यद्यपि ती बैंकहरुले एकिकृत कारोबार सुरु गर्न भने बाँकी छ । पुस ७ गते सम्पन्न दुबै बैंकका वार्षिक साधारणसभाले मर्जरको प्रस्ताव पारित गरेका थिए । त्यसपछि बैंकहरुले अन्तिम स्वीकृतिका लागि राष्ट्र बैंकमा आवेदन दिएका थिए ।

मर्जरपछि मेगा बैंकको १ सय कित्ता सेयर बराबर इन्भेस्टमेन्ट बैंकको ९० कित्ता कायम रहनेछ । अब कुनै सेयरधनीसँग इन्भेस्टमेन्ट बैंकको १ सय कित्ता सेयर छ भने उसको सेयर संख्यामा कुनै परिवर्तन हुँदैन । तर, मेगा बैंकको १ सय कित्ता सेयर हुने सेयरधनीको भने घटेर ९० कित्ता हुनेछ ।

मर्जरपछि नेपाल इन्भेस्टमेन्ट मेगा बैंकको नामबाट एकीकृत कारोबार हुनेछ । कम्पनी रजिष्ट्रारको कार्यालयबाट स्वीकृति पाएपछि दुवै कम्पनीले एकीकृत कारोबार सुरू गर्नेछन् ।

यी कम्पनीले छिट्टै एकिकृत कारोबार सुरु गर्ने जनाएका छन् । कम्पनीले हाल इन्भेस्टमेन्ट बैंकको चुक्ता पुँजी १९ अर्ब ३ करोड र मेगा बैंकको १६ अर्ब ७६ करोड रूपैयाँ छ । मर्जरपछि बन्ने बैंकको चुक्ता पुँजी ३५ अर्ब रुपैयाँ हाराहारीमा पुग्नेछ ।