२३ असोज, काठमाडौं । सशस्त्र प्रहरीका निलम्बित एआईजी वंशीराज दाहालमाथि कारबाही सिफारिस प्रतिवेदन गृह मन्त्रालयमा बुझाइएको छ ।

आचरण विपरीतको काम गरेको आरोपमा निलम्बनमा परेका सशस्त्र प्रहरीका एआईजी दाहालमाथि छानबिनको जिम्मा अर्का एआईजी अन्जनी कुमार पोखरेललाई दिइएको थियो ।

छानबिनका लागि तीन दिनको म्याद पाएका पोखरेलले प्रतिवेदन गृह मन्त्रालयमा बुझाइसकेको स्रोतले बतायो । ‘करिब १२/१३ पेजको बयान पेपरसहित प्रतिवेदन प्राप्त भएको छ,’ गृह मन्त्रालय स्रोतले अनलाइनखबरलाई भन्यो ।

सशस्त्र प्रहरी नियमावली २०७२ को दफा ११३ मा आचरण विपरीतको काम गर्ने सशस्त्र प्रहरी कर्मचारीलाई भविष्यमा सरकारी सेवाको निमित्त अयोग्य नठहरिने गरी सेवाबाट हटाउने वा बर्खास्त गर्ने व्यवस्था छ । त्यसको निर्णय गर्ने अधिकार गृहमन्त्रीलाई रहेको छ । त्यसैले अब गृहमन्त्री सुधन गुरुङले प्रतिवेदन अनुसार आवश्यक निर्णय गर्न सक्नेछन् ।