समाचार सारांश

• कार्यवाहक प्रधानमन्त्री प्रकाशमान सिंहले राप्ती र बबई नदीमा जलस्तर बढेपछि सुरक्षाकर्मी परिचालन गर्न निर्देशन दिए।
• सुदूरपश्चिम र कर्णाली प्रदेशमा भारी वर्षाको सम्भावना रहेकोले भेरी र बबई नदीमा जलस्तर खतराको तह पार गरेको छ।
• महाकाली र कर्णालीमा पनि जलस्तर बढ्ने पूर्वानुमान रहेकोले कार्यवाहक प्रधानमन्त्रीले सचेत रहन आग्रह गरे।

काठमाडौँ । कार्यवाहक प्रधानमन्त्री प्रकाशमान सिंहले राप्ती र बबई नदीमा जलस्तरले खतराको तह पार गरेको भन्दै जोखिमयुक्त स्थानहरूमा सुरक्षाकर्मीहरू परिचालन गर्न निर्देशन दिएका छन् ।

नेपालको सुदूरपश्चिम र कर्णाली प्रदेशमा आज भारी वर्षाको सम्भावना रहेको र भेरी र बबई नदीमा जलस्तर खतराको तह भन्दा माथि गएकाले जनधनको क्षति हुन नदिन सुरक्षाकर्मीहरू परिचालन गर्न निर्देशन दिएका हुन् । 

कार्यवाहक प्रधानमन्त्री सिंहको भनाइ उद्धृत गर्दै राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख इन्जिनियर दिनेशप्रसाद भट्टले बबई र भेरीमा जलस्तरले खतराको तह पार गरेको अवस्थामा त्यहाँको स्थितिबारे जानकारी लिनुभएको बताए । उनले जनधनको क्षति हुन नदिन समयमै सतर्कता अपनाइ सुरक्षाकर्मीहरू जोखिमयुक्त स्थानमा तैनाथ गर्न निर्देशन दिएको जानकारी दिए । साथै मंगलबार महाकाली र कर्णालीमा पनि जलस्तर बढ्ने पूर्वानुमान रहेकाले त्यहाँ पनि सचेत हुन आग्रह गरेका छन् । 

उनले भन्नुभयो, ‘राप्ती र बबई नदीमा जलस्तर बढेको स्थितिमा आकस्मिक बैठक बोलाउनुभएको हो । त्यो बाहेक देशभर विपद्मा के भइरहेको छ र कहाँ पानी कति परेको छ भन्ने सन्दर्भमा छलफल गरेका छौँ । आजका लागि राप्ती, बबई, कर्णाली र महाकाली क्षेत्रमा अलि बढी पानी पर्ने भएकाले र जलस्तर बढेकाले सचेत हुन सबै सम्बन्धित जिल्लाका सिडिओहरूलाई र सुरक्षाकर्मी परिचालन गर्न निर्देशन दिनुभयो ।’

कार्यकारी प्रमुख भट्टका अनुसार कार्यवाहक प्रधानमन्त्री सिंहले मधेस प्रदेशमा वर्षाको अवस्थाबारे पनि चासो लिएका छन् । सम्बन्धित जिल्लाका प्रमुख जिल्ला अधिकारीहरूले त्यहाँको वस्तुस्थिति बारेमा पनि कार्यवाहक प्रधानमन्त्री सिंहलाई जानकारी गराए ।

#प्रकाशमान सिंह #बाढी #वर्षा #विपद् #सुरक्षाकर्मी