विराटनगर : विराटनगर महानगरपालिका–४ गणेश चोकस्थित एउटा घरमा मध्यराति चोरी गर्न पुगेका एक जना पुरुषको भाग्ने क्रममा मृत्यु भएको छ । पुरुषोत्तम न्यौपानेको घरमा आइतबार बिहानका राति १२:२० बजेतिर चोरी गर्ने उद्देश्यले प्रवेश गरेका अन्दाजी ३५ /४० वर्षका पुरुषको ३ तलामाथिबाट खसेर घटनास्थलमै मृत्यु भएको मोरङ प्रहरीले जनाएको छ । 

प्रहरीका अनुसार ती व्यक्ति छिमेकीको घर हुँदै न्यौपानेको घरको माथिल्लो तलामा पुगेका थिए । घरधनीले अपरिचित व्यक्तिलाई देखेर होहल्ला गरेपछि आसपासका मानिससमेत जम्मा हुन थालेका थिए ।
मानिसहरू जम्मा भएपछि पक्राउ पर्ने डरले उनी घरबाट भाग्न खोजेको प्रारम्भिक अनुसन्धानबाट खुलेको छ । भाग्ने क्रममा उनले घरको तीन तलामाथिबाट हाम फालेका थिए । भुइँमा खसेपछि गम्भीर घाइते भएका उनको घटनास्थलमै मृत्यु भएको प्रहरीले जनाएको छ ।

घटनाको सूचना पाएपछि मोरङ प्रहरीका डीएसपी सन्तोष श्रेष्ठको नेतृत्वमा प्रहरी टोली घटनास्थल पुगेको थियो । प्रहरीले कानुनी प्रक्रिया पूरा गरी शवलाई पोस्टमार्टमका लागि बिहानका राति करिब २ बजेतिर कोशी अस्पताल पठाएको छ ।

मृतकको साथबाट पहिचान खुल्ने कुनै विवरण फेला नपरेको र हालसम्म उनको नाम, ठेगाना खुल्न नसकेको डीएसपी श्रेष्ठले बताए । श्रेष्ठका अनुसार मृतकको पहिचानको प्रक्रिया अघि बढाएर घटनाको थप अनुसन्धान सुरु गरिएको छ ।