इरान : हिज्बुल्लाहका नेता नाइम कासेमले लेबनान सरकार र इजरायलबीच अमेरिकामा हुने भनिएको आगामी बैठक अस्वीकार गरेका छन् । इजरायली सेनाले लेबनानमाथि आक्रमण तीव्र बनाइरहेको भन्दै उनले यसलाई ‘निष्फल’ प्रयास भएको बताएका छन् ।

सोमबार टेलिभिजनमार्फत दिएको सम्बोधनमा कासेमले सरकारलाई प्रस्तावित वार्तामा सहभागी नहुने ‘ऐतिहासिक र साहसी अडान’ लिन आग्रह गरे । लेबनान र इजरायलका अमेरिकी राजदूतहरू मंगलबार वासिङ्टन डीसीमा भेट्ने तालिका छ, जहाँ दुई देशबीच प्रत्यक्ष वार्ता सुरु गर्ने विषयमा छलफल हुने बताइएको छ ।

कासेमले भने, ‘यी वार्ताहरू हिज्बुल्लाहलाई हतियार त्याग्न दबाब दिने चाल मात्र हुन् ।’ उनले भने, ‘इजरायलले स्पष्ट रूपमा यी वार्ताको उद्देश्य हिज्बुल्लाहलाई निःशस्त्र बनाउनु हो भनेर बताइरहेको छ, जसलाई (इजरायली प्रधानमन्त्री) बेन्जामिन नेतान्याहुले पटक–पटक दोहोर्‍​याइरहेका छन्। त्यसो भए उद्देश्य पहिले नै स्पष्ट भएको वार्तामा कसरी सहभागी हुन सकिन्छ ?’

उनले थपे, ‘हामी आराम गर्ने छैनौँ, रोकिने छैनौं वा आत्मसमर्पण गर्ने छैनौं । बरु, हामी युद्ध मैदानले नै परिणाम देखाउनेछौं ।’ मार्चको सुरुवातमा हिज्बुल्लाहले रकेट आक्रमण गरेपछि इजरायलले लेबनानमाथि युद्ध झनै तीव्र बनाएको हो । नोभेम्बर २०२४ देखि इजरायल र इरान–समर्थित समूहबीच युद्धविराम कायम रहेको भनिए पनि, इजरायलले लगभग दैनिक रूपमा घातक आक्रमणहरू जारी राखेको छ । हिज्बुल्लाहका अनुसार, मार्च २ मा गरिएको आक्रमण अमेरिका र इजरायलले इरानका सर्वोच्च नेता आयतोल्लाह अली खामेनीलाई युद्धको पहिलो दिन हत्या गरेको प्रतिशोधस्वरूप गरिएको थियो ।

त्यसयता, इजरायलको बमबारी र दक्षिणी लेबनानमा गरिएको स्थल आक्रमणका कारण कम्तीमा २,०५५ जनाको मृत्यु भएको छ, जसमा १६५ बालबालिका र ८७ स्वास्थ्यकर्मी समावेश छन् । ६,५०० भन्दा बढी घाइते भएका छन् भने करिब १२ लाख मानिस घरबार छाड्न बाध्य भएका छन् । 
लेबनानी अधिकारीहरूले युद्धविराम सुनिश्चित गर्नु प्राथमिकता भएको बताएका छन्, तर इजरायलले औपचारिक शान्ति वार्ता सुरु गर्न चाहेको जनाएको छ । उसले हिज्बुल्लाहलाई निःशस्त्र बनाउने कुरालाई प्राथमिकता दिएको छ, तर युद्धविराम वा दक्षिणी लेबनानबाट आफ्नो सेना फिर्ता गर्ने विषयमा केही उल्लेख गरेको छैन ।

शनिबार नेतान्याहुले भने, ‘हामी हिज्बुल्लाहका हतियारहरू समाप्त गर्न चाहन्छौँ र पुस्तौँसम्म टिक्ने वास्तविक शान्ति सम्झौता चाहन्छौं ।’ कासेमले प्रस्तावित वार्तालाई ‘लेबनानको सहमति आवश्यक पर्ने विषय’ भन्दै, यसलाई गैर–वार्ताबाट प्रत्यक्ष वार्तातर्फ लैजाने ‘निःशुल्क रियायत’ भनेका छन् ।
उनको सम्बोधनपछि राजधानी बेरुतमा सयौँ मानिसहरूले शुक्रबार र शनिबार विरोध प्रदर्शन गरे । प्रदर्शनकारीहरूले लेबनानी प्रधानमन्त्री नवाफ सलामलाई इजरायलसँग प्रत्यक्ष वार्ता गरेर जनताको विश्वासघात गरेको आरोप लगाए, किनकि इजरायलले अझै पनि बमबारी र आक्रमण विस्तार गरिरहेको छ ।

इजरायली सेनाले सोमबार दक्षिणी महत्वपूर्ण सहर बिन्त ज्बेललाई पूर्ण रूपमा घेरेको जनाएको छ, जबकि हिज्बुल्लाहले त्यहाँ इजरायली सेनाविरुद्ध आक्रमण जारी राखेको दाबी गरेको छ । कासेमले चेतावनी दिए कि ‘इजरायलका उत्तरी क्षेत्रहरू सुरक्षित हुने छैनन्, चाहे इजरायली सेना लेबनानको जुनसुकै क्षेत्रमा प्रवेश गरे पनि ।’ उनले बेरुत सरकारमाथि युद्ध सुरु हुँदा हिज्बुल्लाहका सैन्य गतिविधिलाई गैरकानुनी घोषणा गरेर ‘पछाडिबाट धोका दिएको’ आरोप पनि लगाए । अन्त्यमा उनले भने, ‘इजरायल र अमेरिकाले लेबनानी सेनालाई सशक्त बनाएर हिज्बुल्लाहलाई निःशस्त्र पार्न र लड्न लगाउन चाहेका छन् … तर सेनाले त्यो गर्न सक्दैन ।’