साफ यू–१६ फुटबल च्याम्पियनसिपमा बंगलादेशले भारतलाई हराएको छ । 

मंगलबार एन्फा कम्प्लेक्स सातदोबाटोमा भारतलाई ३–१ गोल अन्तरले हराउँदै बंगलादेश फाइनल प्रवेश गरेको छ । 

पहिलो हाफमा १–० को अग्रता लिएको बंगलादेशले दोस्रो हाफमा दुई गोल थपेको थियो । 

खेलमा अग्रता बंगलादेशले नवौं मिनेटमा अल्पी अख्तेरको गोलमा लिएको थियो । दोस्रो हाफको ५५ औं मिनेटमा भारतकी अनुश्का कुमारीले खेल बराबरीमा ल्याएकी थिईन् । 

खेलको ७८ औं मिनेटमा सौरभी प्रितिले बंगलादेशलाई २–१ को अग्रता दिलाएकी थिईन् । खेल सकिन एक मिनेट अघि अर्पिता विश्वासले बंगलादेशका लागि तेस्रो गोल गरिन् । 

बंगलादेश लिग चरणमा एक खेल बाँकी छदै फाइनल प्रवेश गरेको हो । 

समूह तालिकामा बंगलादेश २ खेलबाट ६ अंक जोडेर शीर्ष स्थानमा छ । भारत र नेपाल समान ३ अंक सहित क्रमश दोस्रो र तेस्रो स्थानमा छन् । भुटान अंक विहीन हुँदै प्रतियोगिताबाट बाहिरिएको छ ।

लिग चरणका शीर्ष दुई टिमले फाइनल खेल्ने तालिका रहेको छ । नेपालले फाइनल प्रवेशका लागि बिहीबार भारतसँग खेल्नेछ ।