करेन्ट लागेर वृद्धको मृत्यु
१४ पुस, पर्वत । पर्वतको महाशिला गाउँपालिका वडा नं. ५ लुंखुदेउरालीमा करेन्ट लागेर एक वृद्धको मृत्यु भएको छ ।
वडा नं.५ मिलनचोक निवासी ६४ वर्षीय मनिलाल मल्लको बिहीवार दिउँसो मृत्यु भएको हो ।
दिउँसो करिब एक बजेको समयमा आफ्नै बारीमा रहेको लप्सी टिप्न रुख चढेका मल्लले लप्सी झार्न प्रयोग गरेको बाँसको लौरोले विद्युत लाईनमा छुँदा घटनास्थलमै मृत्यु भएको हो ।
मोदी– लुंखुदेउराली विद्युत सब–स्टेसन प्रसारण लाइनको तारमा छुँदा करेन्ट लागेर उहाँ रुखबाट खस्नुभएको थियो ।
करेन्ट लागेपछि स्थानीय महाशिला आधारभुत अस्पतालमा लैजादै गर्दा बाटोमै मृत्यु भएको प्रहरीले जनाएको छ ।
मृतकको शव पोष्टमार्टका लागि सोही अस्पतालमा राखिएको छ ।
स्थानीय देउराली बजारदेखि सव–स्टेसन सम्मको विद्युत प्रशारण लाईन वर्षायाममा गएको पहिरोका कारण समस्याग्रस्त रहेको छ ।
प्रतिक्रिया दिनुहोस्