१ साउन, ढल्केवर(धनुषा)  । धनुषामा भारतीय कारले मोटरसाइकललाई ठक्कर दिँदा एकजनाको मृत्यु भएको छ। शनिबार राति ९ बजे ढल्केवर–जनकपुर सडकखण्ड अन्तर्गत मिथिला नगरपालिकास्थित बसही पुल नजिक भारतीय कारको ठक्करबाट मोटरसाइकल चालकको मृत्यु भएको प्रहरीले जनाएको छ।

मृत्यु हुनेमा धनुषाको मिथिला नगरपालिका–१ ढल्केवरका ३६ वर्षीय शिवलाल यादव रहेको ईलाका प्रहरी कार्यालय ढल्केवरका प्रहरी निरीक्षक रामसागर सिंहले जानकारी दिए।

जनकपुरबाट ढल्केवरतर्फ आउँदै गरेको ज.९प ९४३५ नम्बरको मोटरसाईललाई पछाडीबाट बिआर ०१ जेए ९७७० नम्बरको भारतीय कारले ठक्कर दिँदा दुर्घटना भएको हो।

दुर्घटनामा गम्भीर घाइते भएका मोटरसाइकल चालक यादवलाई उपचारका लागि जनकपुर लैजाने क्रममा बाटोमै उनको मृत्यु भएको प्रहरी निरीक्षक सिंहले जनाए। मृतकको शव पोस्टमार्टमका लागि प्रादेशिक अस्पताल जनकपुरधाममा राखिएको उनले बताए।

ठक्कर दिने भारतीय कार र त्यसका चालक प्रहरी नियन्त्रणमा रहेको ईलाका प्रहरी कार्यालय ढल्केवरले जनाएको छ।