१६ फागुन, काठमाडौं । सुनधारास्थित काठमाडौं मल अगाडि बन्दकर्ताले सार्वजनिक गाडीमा तोडफोड गरेका छन् ।

सोमबार बिहान बन्दकर्ताले बा३ख११५८ नम्बरको दक्षिणकाली–चोभार यातायातको गाडी तोडफोड गरेको हो ।

महानगरीय प्रहरी परिसर काठमाडौंका एसपी दिनेशराज मैनालीका अनुसार मोटारसाइकलमा आएकाहरुले गाडीमा ढुंगा हानेर भागेका थिए । बसमा सामान्य क्षति पुगेको छ ।

मिलेनियम च्यालेन्ज कर्पोरेशन (एमसीसी) संसदबाट अनुमोदन भएको विरोधमा ६ वटा कम्युनिष्ट संगठन र दुईवटा मोर्चाले आज बन्दको आह्वान गरेका छन् ।

विप्लव नेतृत्वको नेपाल कम्युनिष्ट पार्टी, मोहन विक्रम सिंह नेतृत्वको नेपाल कम्युनिष्ट पार्टी (मसाल) र मोहन वैद्य ‘किरण’ नेतृत्वको नेकपा क्रान्तिकारी माओवादी लगायतले बन्दको आह्वान गरेका हुन् ।