गण्डकी प्रदेशभरका एउटा महानगरसहित २७ वटा नगरपालिकाको सहभागितामा कोषले प्रादेशिक कार्यशाला गोष्ठीको आयोजना गर्दै नगरका योजनामा लगानीका सम्भावनामा गहन छलफल चलाएको छ । 

स्थानीय सरकारलाई बजेट लगानी गर्नुपूर्व नगर सरकारको योजना पहिचान, व्यवस्थापन लगायतमा क्षमतामा विकास गर्नुपर्ने गण्डकी प्रदेशका मुख्यमन्त्री पृथ्वीसुब्बा गुरुङले बताए । 

देश कागजमा लेखिएका अक्षरले मात्रै परिवर्तन नआउने भन्दै मुख्यमन्त्री गुरुङले सोच र शैलीमा परिवर्तन नल्याई समृद्धि सम्भव नभएको बताए । 

नगर सरकारलाई पूर्वाधारमा लगानीसँगै व्यवस्थापनमा क्षमता विकास गर्नु नगर विकास कोषको प्रमुख दायित्व रहेको कोषका कार्यकारी निर्देशक कृष्ण सापकोटाले बताए । यसका लागि कोष अब निगममा रुपान्तरण हुन लागेकोले यसलाई अपनत्व लिइदिन नगर सरकारसँग सापकोटाले अनुरोध गरे । 

नगर सरकारलाई ऋण प्रवाह गर्ने सरकारी तहको ठूलो र एउटै निकाय नगर विकास कोष भएकाले प्रत्येक पालिकालाई लगानी गर्न कोष इच्छुक रहेको कार्यकारी निर्देशक सापकोटाको भनाइ छ । 

पोखरा महानगरपालिकाका प्रमुख मानबहादुर जिसीले विगतमा कोषले खानेपानीका क्षेत्रमा गरेको लगानीबाट प्राप्त प्रतिफल उत्कृष्ट रहेको भन्दै कोषलाई धन्यवाद दिए । 

नेपाल नगरपालिका संघका अध्यक्ष अशोक व्याञ्जुले ऋण लगानीबाट निर्माण हुने पूर्वाधार छनौटमा विशेष ध्यान दिन पालिका सरकारलाई आग्रह गरे । नगरपालिका वित्त तथा क्षमता विकास (एम्एफसिबी) कार्यक्रममार्फत नगर विकास कोषले मुलुकभरका १५ वटा पालिकामा सञ्चालित पाइलट प्रोजेक्टको उपलब्धि तथा चुनौतिका विषयमा पनि छलफल गरेको छ । 

गोष्ठीमा नगर सरकारले कोषसँग ऋण लिन दिनुपर्ने आवेदन, लगानी गर्ने दायरा तथा सिलिङ, प्रक्रिया आदिका बारेमा समेत जानकारी दिइएको कोषका कार्यक्रम संयोजक सुवासराज पन्तले जानकार दिए ।