साबुन उद्योगमा आगलागी हुँदा ५० लाख बराबरको क्षति
१८ माघ, सप्तरी । सप्तरी सदरमुकाम राजविराजस्थित एक साबुन उद्योगमा आगलागी हुँदा ५० लाख रुपैयाँ बराबरको क्षति भएको छ ।
राजविराज-७ स्थित माँ छिन्नमस्ता साबुन उद्योगमा मंगलबार दिउँसो आगलागी भएको प्रहरीले जनाएको छ ।
प्रारम्भिक अनुसन्धान अनुसार उद्योगमा विद्युत सर्ट भएर आगलागी भएको हुन सक्ने प्रहरीले जनाएको छ ।
आगलागीबाट उद्योगमा तयारी अवस्थामा राखिएको १२ सय कार्टुन लुगा धुने साबुन र १ हजार बोरा तयारी सरफ जलेर नष्ट भएको सप्तरीका डीएसपी माधवप्रसाद काफ्लेले जानकारी दिए ।
प्रहरी, स्थानीय बासिन्दा र दमकलको सहयोगमा आगलागी नियन्त्रणमा लिइएको प्रहरीले जनाएको छ ।
प्रतिक्रिया दिनुहोस्