१ मंसिर, जनकपुरधाम । प्रदेश २ का भौतिक पूर्वाधार विकास मन्त्री रामसरोज यादवमाथि आफ्नै गाउँमा नेपाली काँग्रेसकै कार्यकर्ताद्वारा हातपातको प्रयास भएको छ ।

मन्त्री यादव नेपाली काँग्रेसको वडा अधिवेशनका लागि मुखियापट्टी मुसहरनिया गाउँपालिका पुगेका थिए । वडा अधिवेशनमा हस्तक्षेपको प्रयास गर्दा कार्यकर्ताहरु हातपातको प्रयास गरेको स्थानीय एक नेताले बताए ।

ती नेताका अनुसार हातपातको प्रयास भएपछि मन्त्री यादव भागेर प्रहरी चौकी बहेडाबेला पुगेका हुन् । हातपातमा उत्रेका कार्यकर्ताहरुले र पार्टी उपसभापति विमलेन्द्र निधिको समर्थनमा नाराबाजी समेत गरेका छन् ।

घटनाबारे बुझ्न खोज्दा यादवसँग सम्पर्क हुन सकेन । उनका सल्लाहकार जीवनाथ चौधरीले मन्त्रीमाथि हातपात नभएको दाबी गरे । उनले भने, ‘मन्त्रीज्यूको भतिजासँग ठेलमठेल भएको छ । मन्त्रीमाथि हातपातको कुरा गलत हो ।’

काँग्रेस संसदीय दलका नेता समेत रहेका मन्त्री यादव विगतमा उपसभापति निधिनिकट नै थिए । अहिले निधीको साथ छाडेका छन् ।