पछिल्लो समय खानेपानी, वन जस्ता उपभोक्ताका संस्थामा चरम दलीय राजनीति हावी हुन थालेको भन्दै उपभोक्ताहरुले प्रत्यक्ष चुनाव हुनुपर्ने माग गर्न थालेका छन् ।

२४ माघ, बुटवल । शंकरनगर खानेपानी तथा सरसफाइ उपभोक्ता संस्थाको अध्यक्षमा नेकपा एमाले, नेपाली कांग्रेस र जनमुक्ति पार्टीको गठबन्धनलाई एमालेकै बागी उम्मेदवार झविन्द्र भण्डारीले हराएका छन् ।

भण्डारी ७१ मत पाएर विजयी हुँदा तीन दलीय गठबन्धनका उम्मेदवार रुद्र श्रेष्ठले ३१ मत मात्र पाए । संस्थामा ८ वटा क्षेत्रका १०३ जना पार्षद मतदाता थिए । तीन दलको आधिकारिक उम्मेदवारलाई हराउदै बागी उम्मेदवार भण्डारीले शानदार जित हासिल गरेपछि एमाले रुपन्देहीमा तरंग उत्पन्न भएको छ ।

नेकपा एमाले र नेपाली कांग्रेसबीच भण्डारीलाई अध्यक्षको उम्मेदवार बनाउन एक महिना अघि नै सहमति भएको थियो । पछि जनमुक्ति पार्टी पनि थपिएको थियो ।

रुपन्देही ५ का संघीय सांसद एवं एमाले तिलोत्तमा नगर इञ्चार्ज बासुदेव घिमिरे संयोजक रहेको संयन्त्रले पटक–पटक बैठक गरेर झविन्द्रको नाम अनुमोदन पनि गरेको थियो ।

तिलोत्तमाको वडा नं १ देखि ४ सम्मका पार्टी वडा इञ्चार्ज र र ४ वटै वडाका शाखा कमिटी अध्यक्षहरुले झविन्द्रलाई अध्यक्ष बनाउने निर्णयमा हस्ताक्षर गरेका थिए ।

तर निर्वाचनको केही दिनअघि एमाले नगर अध्यक्ष मिनप्रसाद पोखरेलले जिल्ला अध्यक्ष यज्ञ गैरेको समेत निर्देशन र जिल्ला इञ्चार्ज एवं पूर्व मुख्यमन्त्री लिला गिरीको समर्थनमा रुद्र श्रेष्ठलाई अध्यक्षमा अघि सारेपछि विवाद भएको थियो ।

कांग्रेसका नगर सभापति हरिलाल पाण्डे, एमाले नगर अध्यक्ष पोखरेल र जनमुक्तिकी नगर अध्यक्ष राधिका श्रीस पुनले हस्ताक्षर गरी रुद्र श्रेष्ठ आधिकारिक उम्मेदवार भएको भन्दै पार्षद (मतदाता) लाई उम्मेदवारको सूूचि बाँडेर मत मागिएको थियो ।

पूर्व सहमति र निर्णय विरुद्ध अर्को निर्णय भएपछि नगर इन्चार्ज बासुदेव घिमिरेले राजनीतिक अराजकता भन्दै सामाजिक सञ्जालबाटै असन्तुष्टि जनाएका थिए । उनले ‘हरेक निर्णयहरु गर्दा फरक मत राख्न सकिन्छ तर विधिसम्मत निर्णय भएको विषयलाई निःशर्त कार्यान्वयन गर्नु प्रत्येक सदस्यको दायित्व र कर्तव्य पनि हो । आधिकारिक निर्णयको विरुद्धमा जानु भनेको राजनीतिक अराजकता हो’ भनेर लेखेका थिए ।

संयन्त्रको वैठकले गरेको निर्णयमा नगर इञ्चार्ज सहित ४ वटा शाखा कमिटी अध्यक्ष र इन्चार्जले हस्ताक्षर गरेका थिए । जसमा नगर अध्यक्ष मिनप्रसाद पोखरेल र दिनेश फुल्लेलले हस्ताक्षर गरेका थिएनन् ।

मतदानको दिन जिल्ला अध्यक्ष यज्ञ गैरेले जिल्ला कमिटीका सदस्यहरुलाई फोन गरेर नगर अध्यक्षको निर्णय नै आधिकारिक हो भनेका र पार्टी पोलिटब्युरो सदस्य समेत रहेका पूर्वमुख्यमन्त्री एवं प्रदेश सांसद लिला गिरीले जिल्ला अध्यक्षले भने अनुसार गर्नू भनेर कार्यकर्तालाई निर्देशन दिएको एमाले तिलोत्तमाका एक नेताले बताए ।

तल्लो तहबाट भएको निर्णयलाई उल्टाएर माथिल्लो तहका एकाध नेताले कार्यकर्ताको भावना विपरीत निर्णय गर्दैमा नतिजा पक्षमा नआउने तथ्य शंकरनगर खानेपानीको चुनावले पुष्टी गरिदिएकोले यसबाट पाठ सिक्नुपर्ने ती नेताले बताए ।

नगर अध्यक्षले एकलौटी ढंगले फरक उम्मेदवार अघि सारेका र त्यसलाई जिल्ला अध्यक्ष र जिल्ला इञ्चार्जले समेत साथ दिनुले नेकपा एमाले भित्र बहुमतको निर्णय स्वीकार गरेर जानुपर्ने सर्वमान्य विधि विपरीत मनोमानी र अराजकता मौलाउन थालेको त होइन भनेर पार्टी पंक्तिमा चिन्ता उत्पन्न भएको एमाले तिलोत्तमाका एक नेताले बताए ।

‘विधि पद्धति मानेर पार्टीलाई एकताबद्ध रहेको सन्देश दिनुपर्नेमा भइसकेको निर्णयलाई उल्टाउने परिपाटीले आगामी दिनमा पार्टीलाई कमजोर बनाउँछ, यसतर्फ जिम्मेवार नेताको ध्यान जान जरुरी छ’ ती नेताले भने ।

यस्तै उपाध्यक्षमा नेपाली कांग्रेसका चन्द्रकान्त खनाल ४८ मत पाएर निर्वाचित भएका छन् । उपाध्यक्षमा कांग्रेसका बागी उम्मेदवार बस्नेतले ४४ मत पाए । सचिवमा एमालेकै कमला ज्ञवाली र कोषाध्यक्षमा कांग्रेसका भीम पौडेल निर्विरोध निर्वाचित भए ।

आठवटा क्षेत्रगत संयोजक मध्ये ५ जना निर्विरोध निर्वाचित भएका छन्, भने ३ संयोजकहरु मतदान प्रक्रियाबाट निर्वाचित भएका छन् । क्षेत्र नम्बर ५ को संयोजकमा मानबहादुर थापाले ८ मत ल्याएर निर्वाचित भएका छन् भने उनका प्रतिस्पर्धी टिकाराम खनालले ७ मत ल्याएर उपविजेता बनेका छन् । क्षेत्र नम्बर ८ को संयोजकमा ८ मत ल्याएर राजेन्द्र घिमिरे निर्वाचित भएका छन् भने उमाकान्त सापकोटाले ४ मत प्राप्त गरेका छन् ।

क्षेत्र ६ को संयोजकमा माओवादी केन्द्रका सौरभ भुसालले ८ मत ल्याएर निर्वाचित भएका छन् भने ज्ञानु आत्रेयलाई ५ मत परेको थियो । त्यस्तै क्षेत्र नम्बर १ को संयोजकमा एमालेका खिलबहादुर पौडेल, क्षेत्र नम्बर २ को संयोजकमा कांगे्रसका गोपाल थापा, क्षेत्र नम्बर ३ को संयोजकमा कांगे्रसका दुर्गबहादुर क्षेत्री, क्षेत्र नम्बर ४ को संयोजकमा एमालेका पुष्करनाथ पन्त र क्षेत्र नम्बर ७ को संयोजकमा कांग्रेका जनकलाल पाण्डेय निर्विरोध निर्वाचित भएका छन् ।

पुस १८ गते पार्षदको चुनाव भए पनि कांग्रेस र एमालेबीच आन्तरिक किचलोले झण्डै डेढ महिनापछि मात्रै चुनाव भएको हो । पछिल्लो समय खानेपानी, वन जस्ता उपभोक्ताका संस्थामा चरम दलीय राजनीति हावी हुन थालेको भन्दै उपभोक्ताहरुले प्रत्यक्ष चुनाव हुनुपर्ने माग गर्न थालेका छन् ।