२२ असार, काठमाडौं । निर्माणाधीन नागढुंगा-नौबिसे सुरुङमार्गमा अर्को साउनदेखि गाडी कुदाउन सकिने आयोजनाले जनाएको छ। सोही लक्ष्यका साथ अहिले काम भइरहेको बताइएको छ।

२०८१  असार मसान्तसम्ममा सुरुङमार्गको काम सकेर साउन पहिलो साताबाट सवारीसाधनका लागि खुला गरिने  नागढुंगा-नौबिसे सुरुङमार्ग आयोजनाका निर्देशक नरेशमान शाक्यले बताए। उनका अनुसार सो लक्ष्य पूरा गर्न अहिले दुई सिफ्टमा फुल फ्लेजमा काम भइरहेको छ।

‘केही समय काम सुस्त भएको भए पनि अहिले फुल फ्लेजमा भइरहेको छ। दैनिक १० देखि १२ मिटरसम्म सुरुङमार्ग खन्ने काम पूरा भइरहेको छ,’ उनले भने, ‘सुरुङमार्गसँगै हामी लाइनिङ लगायतका  फिनिसिङको काम पनि सँगसँगै गरिरहेका छौं।’ अहिले दुवैतिरको पोर्टलमा गरी दैनिक ५४० जनाले काम गरिरहेका छन्। 

त्यसैगरी, आयोजनामा केही समस्या आए त्यत्ति नै बेला निर्णय दिने गरिएको छ। जसका कारण काममा ढिलाइ हुन पाउँदैन। सबै निकायसँग सहकार्य र समन्वय भएको शाक्यले दावी गरे।

आयोजनाले निर्माण कम्पनी, परामर्शदाता र सरकारसँग छलफल गरी समस्या समाधनको उपायहरु सुल्झाएर निर्माण कार्यलाई फुलफ्लेजमा संचालन गरिरहेको हो।

‘अब यसका लागि कुनै अवरोधहरु छैनन्। मुआब्जा वितरणदेखि क्षतिपूर्तिका सम्पूर्ण कार्यहरु अन्तिम चरणमा पुगेको छ,’ उनले भने, ‘फिनिसिङ गर्नुभन्दा ६ महिनाअगाडि मुख्य सुरुङको ब्रेकथ्रु हुन्छ तर सकेसम्म लक्ष्यभन्दा चार महिनामा सुरुङमार्ग गाडी कुदाउन तयार पार्ने गरी वर्कआउट भइरहेको छ।’

सुरुङमार्गबाहिर पहुँचमार्ग निर्माणको काम भइरहेको छ। काठमाडौंतिर ओभरपास निर्माण सकिएको छ। यस्तै, बलम्बुमा फ्लाइओभर निर्माणको तयारी थालिएको छ।

फ्लाईओभरको लागि मात्र मुआब्जा प्रतिशत बाँडिसकेको छ। बाँकी २० प्रतिशत मुआब्जा रकम यही आर्थिक वर्षभित्र बाँड्ने योजना छ। ‘आवश्यक सबै रकम अर्थबाट निकासा पाइसकेका छौं। विवाद खासै छैन। करिब एक साताजतिमै बाँडिसक्छौं,’ उनले भने।

मुख्य सुरुङ खन्ने काम ५६ प्रतिशत पूरा भएको छ। मुख्य सुरुङ र सहायक सुरुङ (इभाकुएसन) गरी ३०७२ मिटर सुरुङ खन्ने काम पूरा भएको छ।

काठमाडौंतर्फ मुख्य सुरुङ ७१८ मिटर र सहायक सुरुङ ८७६ मिटर पूरा भएको आयोजनाले जनाएको छ। यस्तै, धादिङतर्फ ६५९ मिटर मुख्य र ६३१ मिटर इभाकुएसन टनेल खन्ने काम सकिएको छ। धादिङतर्फ १२६ मिटर अडिट टनेल पूरा भएको छ भने ६२ मिटर क्रस प्यासेज पनि निर्माण भएको छ। इभाकुएसनको कुल लम्बाई २५५७ मिटर र मुख्य सुरुङ २६८८ मिटर रहेको छ।

इभाकुएसन टनेल आपतकालीन अवस्थामा प्रयोगका लागि मुख्य सुरुङमार्गसँगै समानान्तर हुने गरी बनाइने सुरुङ हो। यसरी समानान्तर हुनेगरी खनिने इभाकुएसन टनेललाई प्रत्येक ३७५ मिटरमा सहायक बाटो (क्रस प्यासेज) ले मुख्य सुरुङसँग जोड्छ।

आयोजनाका अनुसार अहिले सुरुङमार्गभित्रको कामलाई मुख्य प्राथमिकता दिएर धमाधम अघि बढाइएको छ। हाल मुख्य सुरुङको काम फिनिसिङ अथवा कंक्रिट लाइनिङ गर्ने कार्य भइरहेको छ। जसमा हालसम्म ४३६ मिटर मुख्य सुरुङको कंक्रिट गर्ने काम सकिएको छ। यो कुल सुरुङको १८ प्रतिशत हो।

यस्तै, मुख्य सुरुङका साथै तीनवटा अण्डरपास, चारवटा बक्स कल्भर्ट, ओभरपास, तीनवटा ब्रिज लगायतको बाहिरका संरचनाको हालसम्म काम ३९% काम सम्पन्न भएको छ।