क्वालालम्पुर । मलेसियामा मंगलबार एउटा भयानक दुर्घटना भएको छ ।  क्वालालम्पुर बाहिर एक उपनगरमा भीषण आगलागी भएको हो । आगलागीको कारण ग्यास पाइपलाइन विस्फोट बताइएको छ । यसपछि मानिसहरू आत्तिएर यताउता भाग्न थाले । आगोका कारण वरपरका क्षेत्रका घरहरू खाली गर्नुपर्‍यो ।

मध्य सेलाङ्गोर राज्यको पुत्रा हाइट्समा रहेको ग्यास स्टेसन नजिकै लागेको आगो धेरै किलोमिटरसम्म देखिएको थियो । यस घटनामा ३३ जना घाइते भएको अधिकारीहरूले भनेका छन् । घाइतेमध्ये ६ जनालाई अस्पताल लगिएको छ । घरमा फसेका केही मानिसहरूको उद्धारकार्य जारी छ । 

सेलाङ्गोरबाट दर्जनौं अग्निनियन्त्रकहरूलाई घटनास्थलमा पठाइएको छ । विभागका निर्देशक वान मोहम्मद रजाली वान इस्माइललाई उद्धृत गर्दै समाचार एजेन्सीले रिपोर्ट गरेको छ कि घटनास्थलमा रहेका अग्निनियन्त्रकहरूले पाइपलाइन फुटेका कारण आगलागी भएको बताएका छन् । 

आगो र धुवाँको तस्बिर र भिडियोहरू सामाजिक सञ्जालमा भाइरल भइरहेका छन् । बिहान ८ः१० बजे यसको एउटा ग्यास पाइपलाइनमा विस्फोट भएपछि आगलागी भएको राष्ट्रिय तेल कम्पनी पेट्रोनासले एक विज्ञप्तिमा भनेको छ । 

प्रभावित पाइपलाइनलाई अलग गरिएको छ । आगलागी स्थल नजिकै रहेका तीनवटा ग्यास स्टेसनहरू प्रभावित भएका छैनन् । तर सावधानीका रूपमा अस्थायी रूपमा बन्द गरिएको छ । घटनाबारे छानबिन चलिरहेको छ ।