अर्थतन्त्रको उत्थानमा निजी क्षेत्रको भूमिका महत्त्वपूर्ण
काठमाडौँ । प्रधानमन्त्री शेरबहादुर देउवाले नेपालको अर्थतन्त्रको उत्थानमा निजी क्षेत्रको भूमिका महत्त्वपूर्ण हुने बताउनुभएको छ ।
आर्थिक समृद्धिका लागि निजी क्षेत्रको योगदान महत्त्वपूर्ण हुने भन्दै प्रधानमन्त्रीले निजी क्षेत्रको प्रयासमा सरकारको साथ रहने बताउनुुभएको जानकारी प्रधानमन्त्रीको कार्यालयका उपसचिव बद्री तिवारीले दिनुुभयो ।
नेपाल उद्योग परिसङ्घको नवनिर्वाचित पदाधिकारीसँग बिहीबार भएको भेटमा प्रधानमन्त्री देउवाले परिसङ्घका अध्यक्ष विष्णुकुमार अग्रवाल नेतृत्वको टोलीलाई बधाई एवं कार्यकालको सफलताको शुभकामना दिनुभयो ।
भेटमा परिसङ्घका अध्यक्ष अग्रवालले जनजीवन सामान्य बनाउन र अर्थतन्त्रमा गतिशीलता दिन सबैलाई खोपको व्यवस्थापन हुनुपर्नेमा जोड दिनुभयो ।
कोभिडको भ्याक्सिन वितरणमा उद्योगी व्यवसायी र उद्योग व्यवसायमा कार्यरत कर्मचारीलाई प्राथमिकतामा राख्नुपर्ने उहाँले आग्रह गर्नुभयो ।
यसैबीच परिसङ्घ पदाधिकारीले बिहीबार नै ऊर्जा, जलस्रोत तथा सिँचाइमन्त्री पम्फा भुसाललाई पनि भेटेको थियो । भेटका क्रममा मन्त्री भुसालले औद्योगिक क्षेत्रको विद्युत् महसुल पनि घटाउने बताउनुभएको छ ।
मन्त्रालय नेतृत्व गरेलगत्तै गरिब परिवारलाई निःशुल्क र गार्हस्थ उपभोक्तालाई सस्तोमा बिजुली दिने आफ्नो योजना सुनाउनुभएकी मन्त्री भुसालले बिहीबार उद्योगी व्यवसायीलाई पनि सस्तोमा बिजुली उपलब्ध गराउने आश्वासन दिनुभएको नेपाल उद्योग परिसङ्घले जनाएको छ ।
भेटमा ऊर्जामन्त्री भुसालले देशमा विद्युत् उत्पादन बढ्दै जाँदा औद्योगिक क्षेत्रको महसुुल पनि कम गर्ने बताउनुभएको हो ।
आफू अहिले गार्हस्थ विद्युत्को महसुल घटाउने योजनामा लागेको र त्यसपछि औद्योगिक क्षेत्र पनि महसुल सस्तो बनाउने बताउनुभएको हो ।
मन्त्री भुसालले आर्थिक विकास, गरिबी निवारण, औद्योगिक विकास र कृषिको विकासका लागि ऊर्जा कच्चा पदार्थ भएकाले यसको सुलभ उपलब्धता आवश्यक रहेको बताउनुभयो ।
उहाँले भन्नुभयो, “आर्थिक विकासको कच्चा पदार्थ विद्युत् हो, कच्चा पदार्थ बेचेर कोही धनी भएको छैन, हामी पनि आन्तरिक खपतमा नै जोड दिने छौँ । ”
मन्त्री भुसालले आफू विद्युत् क्षेत्रका समस्या समाधान गर्न सबैखाले नीतिगत सहजीकरण गर्न तयार रहेको पनि बताउनुभएको थियो ।
मन्त्री भुसालले डेडिकेटेड र ट्रङ्क लाइनको विद्युत् महसुलसम्बन्धी विवाद आफ्नो मन्त्रालयले मात्रै टुङ्ग्याउन नसक्ने उल्लेख गर्नुभयो ।
परिसङ्घका अध्यक्ष अग्रवालले पावर ह्विलिङको व्यवस्था कार्यान्वयनका लागि आवश्यक कार्यविधि जारी गर्न आग्रह गर्नुभयो ।
उहाँले विद्युत् निर्यातको सट्टा स्वदेशी उद्योगहरूलाई निर्यातकै दरमा गुणस्तरीय विद्युत् उपलब्ध गराउँदा आन्तरिक बजारमा विद्युत् खपत बढ्ने र अर्थतन्त्रको योगदान गर्ने बताउनुभयो ।
उद्योगहरूले अहिले पनि ट्रिपिङ, कम भोल्टेजजस्तो समस्या भोगिरहेको भन्दै उहाँले विद्युत्को गुणस्तरमा सुधारमा ध्यान दिन पनि मन्त्री भुसालको ध्यानाकर्षण गर्नुभएको थियो ।
परिसङ्घले एक घर एक विद्युतीय चुलो अभियान चलाउन पनि सुझाव दिएको छ । एक एक सहरमा विस्तार गर्न पनि सरकारलाई सुझाव दिएको छ ।
परिसङ्घले एक प्रदेशमा कम्तीमा एउटा सय मेगावाटभन्दा ठूला जलाशयुक्त वा अर्धजलाशययुक्त जलविद्युत् आयोजना अगाडि बढाउन पनि सरकारलाई सुझाव दिएको छ ।
प्रतिक्रिया दिनुहोस्