काठमाडौँको बूढानीलकण्ठमा बरामद झण्डै २२ किलो सुन चिनियाँ नागरिकको भएको खुलेको छ। उनीहरूले त्यहाँ घर भाडामै लिएर सुनको कारोबार गर्ने गरेको प्रहरी उच्च स्रोतको दाबी छ। सुनसहित काठमाडौँ उपत्यका अपराध अनुसन्धान कार्यालयको टोलीले तीन जना चिनियाँ नागरिकलाई पक्राउ गरेको छ। 

विभिन्न स्वरुपमा तस्करी गरेर ल्याएको सुन त्यहाँ पगाल्ने र विभिन्न आकारमा तयार गर्ने गरेको खुलेको छ। यसका लागि प्रयोग हुने उपकरण पनि प्रहरीले बरामद गरेको छ। 

‘अहिले पनि टोली त्यसैमा लागिरहेको छ। सबै काम सकिएको छैन। जम्मा सुन २१ किलो बढी र २२ किलो अलिक नपुग होला, टोलीले हेर्दैछ’, प्रहरी स्रोतले भन्यो। 

त्यहाँ सुन रहेको सूचना पाएको प्रहरीले बिहीबार दिउँसोबाट अप्रेसन चलाएको हो। त्यसक्रममा केही ढिक्का र केही झोल अवस्थामा सुन बरामद गरेको छ। 

तर उक्त सुन कहाँबाट ल्याइएको हो भन्ने खुलेको छैन। प्रसोधनपछि भारत लैजान लागिएको भन्ने सूचना प्राप्त भएको र अहिले पक्राउ परेका व्यक्तिहरुसँग सोधपुछ भइरहेको पनि प्रहरी स्रोतले जानकारी दिएको छ।

यसअघि चिनियाँ नागरिकले नै ब्रेकसुमा भित्र्याएको ६१ किलो सुन बरामद भएको थियो। उक्त अनुसन्धानमा त्यसअघि पनि यसैगरी ठूलो परिमाणमा सुन भित्र्याएको खुलेको थियो।

प्रहरीले थप अनुसन्धान गरिरहेको जनाएको छ। काठमाडौँ उपत्यका अपराध अनुसन्धान कार्यालयले यस विषयमा जानकारी दिन शुक्रबार दिउँसो १ बजे पत्रकार सम्मेलन गरेर विस्तृतमा जानकारी दिने भएको छ।