काठमाडौं । सरकारी स्वामित्वको नेपाल टेलिकमले देशभरका करिब १ हजार ६ सय टुजी तथा फोरजी वायरलेस बेस स्टेसन विस्तार र स्तरोन्नतिका लागि गर्न लागेको एन्टेना खरिदमा ठूलो घोटला हुनसक्ने आशंका गरिएको छ ।

विश्वका प्रमुख एन्टेना उत्पादक राष्ट्रमध्ये पर्ने भारत र चीनमा निर्मित उपकरणलाई अयोग्य ठहरिने गरी खरिद मापदण्ड तयार गरिएका कारण विवादमा आएपछि यसका घोटलाको आशंका गरिएको हो । ‘ठेक्का प्रक्रिया निष्पक्ष हुने–नहुने र यसले सार्वजनिक खरिदसम्बन्धी कानुनी व्यवस्था पालना गर्ने–नगर्ने विषयमा गम्भीर प्रश्न उठेको छ’, नेपाल टेलिकमका एक इन्जिनियरले दृष्टिसँग भने ।

मोबाइल नेटवर्क विस्तार र सेवा गुणस्तर सुधार गर्ने नाममा अघि बढाइएको भनिएको यो खरिद प्रक्रियामा प्रतिस्पर्धा सीमित हुने गरी सर्त राखिएको हो भने त्यसको प्रत्यक्ष असर मूल्य, आपूर्ति समय र टेलिकमको लगानीको प्रभावकारितामा पर्न सक्छ । अझ, उपकरणको प्राविधिक क्षमता र कार्यसम्पादनभन्दा उत्पादन भएको देशलाई योग्यताको आधार बनाउनुको औचित्य के हो भन्ने प्रश्नको जवाफ टेलिकमसँग नभएको पनि ती इन्जिनियरले दाबी गरेका छन् ।

ठेक्कासम्बन्धी कागजातअनुसार, माइक्रोवेभ रेडियो र इन–बिल्डिङ (आईबी) प्रणालीका लागि आवश्यक एन्टेनाको उत्पादक संयुक्त राज्य अमेरिका, क्यानडा, जापान, अस्ट्रेलिया, न्युजिल्यान्ड, बेलायत वा युरोपेली मुलुकको हुनुपर्ने प्रावधान राखिएको छ ।