३० असोज, चितवन । असोज महिनामा मात्रै प्रजनन्योग्य ३ वटा जंगली भाले हात्ती मारिएका छन् । देशका विभिन्न ठाँउमा ३ वटा भाले हात्ती असोज महिना मात्रै मारिए भने यो वर्ष समग्रमा ४ वटा भाले हात्ती मारिएका छन् ।

२०८३ असोज ३ गते चितवन राष्ट्रिय निकुञ्जको सबैभन्दा चर्चित हात्ती रोनाल्डो वरण्डाभार क्षेत्रमा पर्ने बीसहजारी नजिकै रहेको नेपाली सेनाको पोष्टमा लगेको तार चपाउँदा करेन्ट लागेर मर्‍यो।

देशको एक मात्रै हात्ती प्रजनन् केन्द्र सौराहामा केन्द्रित हुने यो हात्तीको मृत्युले हात्ती प्रजननको क्षेत्रमा समस्या आउन सक्ने देखिएको विज्ञहरू बताउँछन् ।

रोनाल्डो मरेको १५ दिन पछि अर्थात असोज १८ गते सर्लाहीको बागमती नगरपालिका–४ मा जंगली भाले हात्ती मृत अवस्थामा भेटियो

ब्रह्मबाबा सामुदायिक वन नजिकै परबलबारीमा भाले हात्ती मृत अवस्थामा फेला परेको हो । हात्तीको सुँढलगायत शरीरका केही भागमा चोटपटकसमेत लागेको अवस्थामा हात्ती मृत भेटिएको थियो ।

यो भाले हात्ती मरेको ९ दिन पछि उदयपुरको बेलका नगरपालिकामा ‘सानो दारे’ नामले चिनिने वयस्क जंगली भाले हात्ती मृत अवस्थामा फेला पर्‍यो । धानबारीमा हात्ती मृत भेटिएको थियो ।

कोशी टप्पु वन्यजन्तु आरक्षबाट एक किलोमिटर सीमावर्ती क्षेत्रमा सानो दारे मृत अवस्थामा फेला परेको थियो । यो हात्ती एक वर्षभन्दा बढी समयदेखि कोशी टप्पु वन्यजन्तु आरक्ष क्षेत्रमा बसोबास गर्दै आएको थियो ।